Punparen zain

Tolosa, 2012ko abenduaren 28a, Inuzente eguna.
Xala-Barriola vs. Gonzalez-Zubieta

“Cien a veinte!”
Parioa gaztelera garbian.
Euskarak baliorik ez pelota vascan.

Mamia eta azala bi dira:
Julian Reteguitik Julen Bi-ra,
Fernando Arrechetik Iker Arretxera,
izanetik izenera.

“Mil a cien!”
Artekari espainolak.
Frantsesak publikoan.
Euskara jokoan.

Txapapera doaz eskuarazko eleak,
goiko koltxoira euskerazkoak,
kontra-kantxara üskazkoak.

5-5
Ados! Jaunak ados!

“bueno”, “es que”, “o sea”, “venga!” ... 
gantxoak eta dejadak Coca-cola hurrupaldietan.

15-15
Ados! Jaunak (eta andereak?) ados!

Ez da kerik ezker paretan
erretzen garen arren;
erdarek erretzen, herrentzen.

22-22
Hogeita bina. 
Diglosiaren partidan ezina.

Gu inuzenteak izaki, ordea. 
Eta segitzen dugu, Godotek nola, 
pilota karratuaren punparen zain.