EUSKAL KULTUR ERAKUNDEAREN AGERKARIA
Angeluko Kabalkada: lurraldean errotutako proiektua
2026.09.30
Angeluarrak Angeluko dantza talde historiko eta enblematikoa da. Badu 60 urte euskal kultura garatzeko eta transmititzeko lanean ari dela. Bere 60. urtemuga ospatzeko, kabalkada bat antolatu nahi izan du 2026ko irailean. Euskal Herrian, kabalkada besta eta ohitura handiko ikusgarri bat da, herriko karriketan barna ibiltzen dena eta herriko plazak hartzen dituena. Zaldizkoen edo karrozen desfileak, euskal jauziak bezalako dantza tradizionalak, musika eta antzerki herrikoi satirikoa nahasten ditu. Angeluarrak taldeak bi emanaldi eskaini ditu, eta gu ere han ginen besta hori hurbiletik bizitzeko.
Aurten, Angeluarrak taldeak 60 urte betetzen ditu. Karia hortara, elkarteak kabalkada bat antolatu nahi izan du Angelun, 2002koa baino 24 urte geroago. Herriko bizimoduan sustraitutako DNAri eutsiz, taldeak ekitaldia bere kide ohiei eta Gaia, Ibaialde edo Manex Goyenetche Kultur Etxea bezalako elkarte angeluarrei ideki die.
Proiektu honek profil, ibilbide eta jatorri sozial anitzeko 16 eta 85 urte bitarteko 300 boluntario bildu ditu. Gazte ala heldu, euskaldun ala erdaldun, guziek puntu komun bat partekatzen dute: beren kulturari dioten atxikimendu sakona, elkarrekin bildu eta aitzina eramaten dituena.
Angeluko Kabalkada ikerketa historiko eta dokumentazio lan garrantzitsu baten fruitua da. Arte eta kultura arloetako profesional askoren esperientzia eta konpromisoa ditu oinarri, eta horiek laguntzen diote elkarteari bere jardunean.
Familiak, gazteak, adineko jendeak... Gaur egun, taldeak 100 kide aktibo ditu. Hamabost urte inguru daramatza partekatzearen eta transmisioaren alde egiten, espazio publikoa berrinbertituz. Angeluarrak-ek urtean zehar egiten du lan, elkarte-sare trinko baten barnean, herriko plazan Ihauteriaren (otsailean), Donibaneko Suteen (ekainean) edo Olentzeroren (abenduan) irudiko ekitaldiak (errituak) garatzeko.
2026ko iraileko bi emanaldiak sorkuntza prozesu luze baten ondotik sortu dira, proiektua tokian berean eraikia eta parte hartzaile multzoak eramana izan delarik. Ikuskizuna baino gehiago, transmisiorako, lankidetzarako eta elkarrizketarako gune gisa finkatzen da Angeluko Kabalkada.
Hizkuntzaren dimentsioa proiektuaren zutabe gisa pentsatua izan da. Helburua euskara baloratzea zen eta, aldi berean, hitz egiten ez dutenen inklusioa bermatzea, Angeluko errealitate soziolinguistikoarekin bat eginez (biztanleriaren gehiengoa euskalduna ez den lurraldea). Hizkuntza proiektuaren erdigunean jartzeko, euskara batzorde bat sortu da Euskal kultur erakundea eta Plazararekilako lankidetza estuan. Erakunde honen eginkizuna euskararen presentzia indartzea izan da ekitaldiaren dimentsio guzietan, eszenatoki gibeletik hasi eta jendearenganaraino.
Besta giro hori hurbilagotik sentitzeko, Kanaldudek errepika batzuk segitu ditu eta prestakuntzaren bihotzean sarrarazten gaituen bideo labur hau eskaintzen digu:
- Euskal kultur erakundearen partaidetzarekin
Lorentxa Saragueta
Komunikazio arduraduna
Testua: Angeluko Kabalkada I Argazkiak: Lorentxa Saragueta & Jakes Larre I Bideoa: Kanaldude
