"SOKA, euskal dantzaren urratsetan" erakusketa Bordelen

2017/11/23

2017ko abenduaren 2tik 2018ko otsailaren 10era, Euskal kultur erakundeak ekoizturiko "Soka, euskal dantzaren urratsetan" erakusketa ibiltaria Bordeleko Mériadeck auzoko mediatekan izanen da ikusgai. Lau hizkuntzatan, euskal dantzaren inguruko eduki aberats anitz eskaintzen ditu multimedian oinarritutako erakusketa honek. Sartzea urririk izanen da.

"SOKA, euskal dantzaren urratsetan" erakusketa Bordelen
Argazkia : Jakes Larre

SOKA, Euskal kultur erakundeak ekoiztua du, Gipuzkoako diputazioarekin eta Donostia 2016 Fundazioaren partaidetzarekin. Euskal dantza hobeki ezagutaraztea du helburu, publiko zabalari batez ere.

Lau hizkuntzatan (euskara, frantsesa, gaztelera, inglesa), 130 m²-ko eremuan, gaiaren inguruko 400 ilustrazio baino gehiago daude kontsultagarri (argazki eta irudi bildumak, lekukotasun zatiak, soinu zatiak e.a.). Artxibo horiei gehitu behar zaizkie euskal dantzaren estetikaz edota alderdi sozialaz eginak izan diren bideo sorkuntzak.
Azpimarratzekoa da bestalde, EKE-k eraman "Eleketa" ahozko memoriaren bilketaren karietara euskal dantzaren inguruko anitz lekukotasun grabatuak izan direla eta horien zati frango ikusgai izanen direla erakusketan. 

Bestalde, edukien aberastasun guzia jendeen esku uzteko, ukipen-pantailak, formatu handiko telebistak, kuadro numerikoak, ordenagailuak eta bideoproiekzio eremuak baliatuak izan dira ere.

Halaber, erakusketaren partaide den Euskadiko Filmategiko altxor batzu erakutsiak dira bertan bai eta bertze artxibo arraro frango ere. 

Adibidez argazki-kazetaritzaren sortzaileetarik bat izan den Robert Capa-k (Endre Friedmann, 1913-1954) 1951ko abuztuan Saran egin argazkien bost erreprodukzio ikusten ahal dira erakusketan. Balio handiko dokumentu eder hauek International Center of Photography de New-York zentroarenak dira.

Bestalde, Gabrielle Duplantier-en argazki erakusketa eder bat ikusten ahalko da mediatekako beste gela batean.

Sartzea urririk izanen da.

Denbora berean, oroitarazten dizuegu Lehen urratsa izeneko euskal dantzaren transmisioari buruzko web-dokumentala sarean dela eta Soka erakusketari buruzko aplikazio ludikoa telekargatzen ahal duzuela.

Xehetasunak

  • Mériadeck-eko Mediateka : 05 56 10 30 00
  • Euskal kultur erakundea : 05 59 93 25 25 
  • www.soka.eus

 

Harpidetu doan gure buletinera

Euskal kultur erakundearen berripapera (Hilabetean behin)