HEZHI egitasmoko gazteak Atabalen elkartu dira

2026/06/02

Maritxu Etcheto

2026/06/02

Maiatzaren 26an, HEZHI egitasmoan parte hartzen duten Plentziako Uribe-Kosta institutoko eta Sohütako lizeoko ikasleak Biarritzeko Atabal aretoan elkartu ziren sorkuntza eta topaketa egun berezi batean. Ikasturte osoan zehar garatutako ibilbide artistikoaren baitan, gazteek hainbat diziplina artistiko ezagutzeko eta praktikatzeko aukera izan zuten.

HEZHI proiektua (EFA 158-04) Europar Batasunak batera finantzatu du –% 65– AFOMEF POCTEFA deialdiaren Interreg VI-A Espainia-Frantzia-Andorra Programaren (POCTEFA 2021-2027) bidez. POCTEFAren helburua da Espainia-Frantzia-Andorrako mugaz gaindiko eremuan integrazio ekonomikoa eta soziala indartzea.

HEZHI egitasmoko gazteak Atabalen elkartu dira — CC-BY-SA - EKE - Lorentxa Saragueta

Euskal kultur erakundeak “HEZHI: Mugazgaindiko hezkuntza proiektu eleaniztuna” egitasmoan parte hartzen du Dijitalidadea agentziarekin partaidetzan. Mugazgaindiko proiektu honek ikerketa akademikoak, formakuntza, mugikortasunak eta baliabide pedagogikoen sorkuntza bultzatzen ditu hezkuntza eleaniztunarentzat. EKEk helburu nagusitzat du musikari euskaldunak ezagutaraztea, mugazgaindiko harremanak garatzea eta sorkuntzan aritzeko gogoa transmititzea hego eta ipar Euskal Herriko ikasleei.

Ikasturte osoan zehar garatutako ibilbide artistikoaren baitan, gazteek hainbat diziplina artistiko ezagutzeko eta praktikatzeko aukera izan zuten. Goizean, Odei Barroso rap kantariarekin rap tailer batean aritu ziren, hitzen indarra, erritmoa eta ahozko adierazpena landuz. Ondoren, Ortzi Hegoas Maroteaux musikariaren gidaritzapean txalapartaren unibertsoan murgildu ziren. Azkenik, Maialen Alfaro artistak proposatutako sofrologia saio batean parte hartu zuten, gorputza, arnasketa eta sormena uztartuz.

Topaketa hau ikasturtean zehar Pantxix Bidartekin egindako lanaren emaitza partekatzeko parada ere izan zen. Izan ere, ikasleek hamabi saiotan landutako kantuaren grabaketa egin zuten Atabaleko oholtza gainean berean. Sorkuntza kolektiboaren bidez sortutako piezak gazteen gogoetak, emozioak eta bizipenak bildu ditu.

Ortzi Hegoas Maroteaux - CC-BY-SA - EKE - Lorentxa Saragueta

Egunak aukera eman zien, halaber, bi lizeoetako ikasleei elkar ezagutzeko, esperientziak trukatzeko eta euskararen bidezko sorkuntza kolektibo bat bizitzeko. Musikaren, hitzaren eta gorputzaren bidez, gazteek adierazpen artistikorako bide berriak esploratu zituzten, ikasturtean zehar egindako lanari amaiera emanez.

Maialen Alfaro - CC-BY-SA - EKE - Lorentxa Saragueta

HEZHI egitasmoaren xedeetako bat gazte eleaniztunen artean euskararen erabilerari zentzua ematea da, artearen eta sorkuntzaren bidez. Atabalen ospatutako egun honek helburu hori bete-betean islatu zuen.

Entzun dezagun Esküz esku kantua, Plentziako eta Sohütako ikasleek Pantxix Bidarten laguntzarekin sortua. Euskararen Mapa gaia abiapuntu hartuta, ikasleek elkarrekin sortu, idatzi eta interpretatu dute kantu hau. Grabazioa Atabaleko soinu teknikariak egin du.

Euskal Kultur Erakundea · Esküz esku

Otoi onartu estatistika eta marketin-cookieak soinu horren entzuteko.

Xehetasunak

HEZHI – Hezkuntza arloan eleaniztasuna sustatu

HEZHI proiektuak lurraldeko hizkuntzen irakaskuntza eta ikaskuntza sustatzen ditu, hizkuntza-oztopoak murriztuz eta mugaz gaindiko lankidetza, mugikortasuna eta integrazioa errazteko.

Proiektua ideia batetik abiatzen da: lurraldeko hizkuntza-aniztasuna aberastasuna da, baina erronka ere izan daiteke hizkuntzen ikasteko aukera-berdintasunari dagokionez. Euskara, frantsesa eta gaztelera ez dira modu homogeneo batean irakasten ez erabiltzen Euroeskualdean, eta horrek irakaskuntza-eremu koherente baten eraikuntza mugatzen du.

HEZHIk hezkuntza-eredu eleaniztunei buruzko ikerketa eta hedapena sustatzen du, hizkuntza formakuntza programa berrien baita hizkuntza eta kultura edukietan oinarritzen diren eskola eta eskolaz kanpoko trukaketa programa berrien sortzea ere.

Proiektu berritzaile honek lau ekintza nagusi ditu :

Jardunbide egokiak identifikatuz eta bisiten bitartez mugako lurraldeetako hezkuntza eleaniztuneko marko teoriko-praktikoa sortzea.
Irakasleen eta hezkuntzako profesionalen formakuntza eleaniztuna garatzea.
Baliabide pedagogikoak eta komunikazio-baliabideak sortzea.
Hezkuntza-mugikortasuneko dispositiboak garatzea eta sustatzea.

Partaideak eta kooperazio sarea

HEZHI proiektua, Akitania-Berria Euskadi Nafarroa Euroeskualdeak koordinatzen du eta lurraldeko gobernuek (Eusko Jaurlaritza, Nafarroako Gobernua), goi-mailako irakaskuntzako erakundeek (Euskal Herriko Unibertsitatea – UPV/EHU, Mondragon Unibertsitatea – HUHEZI, Bordeaux Montagne Unibertsitatea) eta tokian tokiko heziketa-erakundeek eta erakunde kulturalek (Euskal Herriko Ikastolak, Seaska, Euskal Kultur Elkartea – EKE) parte hartzen dute.

Proiektua hezkuntza eta hizkuntza politiketan adituak diren kideen sare batean oinarritzen da ere : Pirinio Atlantikoetako Departamenduko Kontseilua (CD64), Gipuzkoako Foru Aldundia, IKAS-BI elkartea, Larrun Eskola ikastetxea eta Bordeleko Errektoretza.

Partzuergo orekatu horri esker, mugaz gaindiko espazioan eleaniztasunak dituen erronken aurrean ikuspegi transbertsala eta kolaboratiboa garatu daiteke.

Anbizio handiko ekimen hori koordinatuz, Euroeskualdeak mugaz gaindiko lankidetza indartzeko eta hezkuntzaren kohesio eta berrikuntzaren onerako eleaniztasuna sustatzeko duen eginkizun nagusia berresten du.

Kofinantzaketa europarra

HEZHI proiektuaren (EFA158-04) % 65 Europar Batasunaren laguntzarekin finantzatu da Interreg VI-A España-Francia-Andorra (POCTEFA 2021-2027) programako AFOMEF POCTEFA deialdiaren bitartez. POCTEFAren helburua mugaz gaindiko Espainia-Frantzia-Andorra eremuan integrazio ekonomiko eta soziala sendotzea da.

HEZHIk lau urteko iraupena izango du, hiru ikasturte, 2025eko irailetik aurrera, eta guztira 3.099.609,35 €-ko aurrekontua du, horietarik 2.014.746,08 € Europar Batasunak eskainiak.