Ibilki

Ibilki programaren bidez, Euskal kultur erakundeak Ipar Euskal Herri guzian euskarazko antzerkiaren hedapena sustatzeaz eta sostengatzeaz gain, bultzada berri bat ematen dio. Alabaina, kultura eragile ezberdinak elkartzen dira euskarazko antzerkiaren aldeko sare aktibo baten osatzeko. Ahalak eta gaitasunak batzen dituzte gaur egungo euskal antzerkiaren bizitasuna, kalitatea eta aniztasuna ahalik eta jende gehienei erakusteko asmoz.
Ibilki
Axut ! - Zazpi senideko © DR

Sostengu dispositibo bat euskarazko antzerkia ipar Euskal Herrian hedatzeko

Iparraldeko Herriko Etxeetako kultura zerbitzuekin izenpetu urte batzuetako partaidetza hitzarmenen bidez, badu urte frango EKE-k euskarazko ikusgarrigintzaren hedapena suharki sostengatzen duela.

Arte eszenikoen hedapena hobeki laguntzeko eta Ipar Euskal Herri mailako egiazko hedapen ibilbide bat osatzeko asmoz euskarazko antzerki profesionalarentzat, EKE-k Ibilki programa abiatu du 2013an. Urtero hamar bat hiri elkartuz, EKE-k animatu programa honek euskarazko antzerkiaren hedapenean inplikatuak diren eragile horiei antzerki sorkuntzetaz iritziak trukatzeko, beren ahalak eta gaitasunak batzeko, komunikazio plan amankomun bat lantzeko eta sartze prezio berak ukaiteko aukera ematen die. Denboraldi berri guziz beraz, sareko kideek egin proposamenak aztertu eta, ikusgarri batzuk hautatuak dira lurraldeko toki ezberdinetan hedatuak izateko.

Hauek dira EKE-k eta bere partaideek Ibilki programaren bidez finkatu helburuak:

  • euskarazko antzerkiaren hedapena sostengatzea lurraldean;
  • euskarazko antzerkiari dinamika berri bat ematea;
  • euskarazko antzerkiaren publikoa berritu eta garatzea;
  • euskarazko antzerkiaren programatzaile sare bat sortzea lurraldean.
Programa zenbakitan (2019 denboraldia)
  • 10 antzezlan
  • 13 konpainia
  • 21 emanaldi
  • 10 toki
  • 2625 ikusle
Partaideak (2019)
  • Angeluko hiria
  • Baionako hiria
  • Bastidako hiria
  • Bidarteko hiria
  • Donibane Lohizuneko hiria
  • Hendaiako hiria
  • Hiriburuko hiria
  • Mauleko hiria
  • Miarritzeko hiria
  • Senpereko hiria

Gehiago jakin